Donnerstag, 11. Oktober 2018

Tag 4: Mittwoch

Liebs Tagebuech 

Am Morge hends eus wieder am Viertelab 7ni usem Bett dunneret, mit ihrere  ohrebetäubende Death Metal Mukke. Trotz es Paarne wo uf d’ Schnure gheit sind, bim Versuech als erschts uf em Gang z’ si um sich so es Ringli z’ verdiene, hett sich niemert gröber verletzt. Bereits scho wo Alli wie prügleti Hünd zum Zmorge ghumplet sind, hett mer dütlich gseh, dass de dritti Tag vom Trainingslager aagfange het. De Z`morge isch super gsi, wie immer.

Mittwoch, 10. Oktober 2018

Tag 3: Dienstag

De Ziestig morge isch wie immer verlofe. Mir sind am 7:15Uhr gweckt worde und hend en feine Z’Morge gesse. Am 9 Uhr häts Training den auch scho wieder ahgfange.

Zum Ufwärme hemmer es Mattefuessball miteme chline Handycap gmacht. Wo den au alli warm gsi sind, hemmer zemme nachli Chrafttraining gmacht und hend den ide einzelne Gruppe witer trainiert. Fürs hütige Training isch s’Thema Pass und Service gsi. Am Ahfang vom Training hemmer sochli grundlegendi Passtechnike glernt und nachher hemmer dezue no spezifischi Üebige gmacht.

Dienstag, 09. Oktober 2018

Tag 2: Montag

Am Mäntig het ois de Bob Marley (eigentlich Bobby McFerrin, Anm. der Red.) usem Schlaf gweckt (viertelab 7i isch scho huere früe für ferie...). De Boo mit sim selbergmachte Zopf und Birchermüesli het oise morge aber chönne rette :), so simmer top fit in tag gstartet. Im Training isch halt wie immer am erste Tag s’thema hauptsächlich abnneh gsi. Mir hend zwar uf oisi bretter übercho, defür chunnt jetzt jedi anahm perfekt. Zum Zmittag hend ois de Boo und de Brüde nach ere feine chürbissuppe mit ghacktem und Hörnli gmästet, woruf di meiste zersch mal en mittagsschlaf brucht hend (nei, lang ufblibe het da kei rolle gspillt!).

Montag, 08. Oktober 2018

Tag 1: Sonntag

Ready, Steady, Go!

Am Suntig Mittag sind zahlrichi Smashler am Winti HB iitroffe. Mir hend eus mit em Zug uf de Wäg is schöne Land vo de Willisauer Ringli gmacht. Eusi super Stimmig isch nur no toppt worde vo de fründlichste Postautofahrerin, wo eus bis zu de Unterkunt gfahre het. Bi eusere Akunft hemmer mit Schrecke müese feststelle, dass eusi letschtjährigi Behusig abgrisse worde isch. Nachdem mir e churzi Schweigeminute em übrigblibene Erdhügel gwidmet händ, hemmer eusi Zimmer bezoge und sind i eusi Ämtligruppe ufteilt worde.

Hauptsponsor

Nachwuchssponsor

Sponsor

Ausrüster

Mitglied bei